సీఎం జగన్‌పై పురందేశ్వరి సంచలన వ్యాఖ్యలు
ఏపీ ముఖ్యమంత్రి వైఎస్‌ జగన్‌మోహన్‌రెడ్డిపై సంచలన వ్యాఖ్యలు చేశారు బీజేపీ నేత పురందేశ్వరి. విశాఖలో కేవలం చర్చిలకు మాత్రమే భద్రత కల్పిస్తూ పోలీస్‌ కమిషనర్‌ ఆదేశాలివ్వడం సరికాదన్నారు. ఇలా ఒక మతాన్నో ఒక కులాన్నో కావాలని రెచ్చగొట్టేలా వ్యవహరించడం సమాజంలో ఘర్షణ వాతావరణానికి కారణమవుతుందని వ్యాఖ్యానించారు. రాజమండ్రిలో జరిగిన బీజేసీ సభ్యత్వ నమోదు కార్యక్రమంలో మాట్లాడిన ఆమె.. ఆసక్తికర వ్యాఖ్యలు చేశారు. టీడీపీ హయాంలో కులాలు, కార్పొరేషన్ల పేరుతో విభజన రాజకీయాలు చేశారని.. ఇలాంటి విధానాలను ప్రజలు గమనిస్తున్నారన్నారు పురందేశ్వరి. వైసీపీ ప్రభుత్వం కూడా తమ తీరు మార్చుకోవాలన్నారు. ఏపీకి కేంద్రం ప్యాకేజీ మాత్రమే ఇవ్వగలదని.. హోదా సాధ్యం కాదన్నారు పురందేశ్వరి. తెలంగాణతో కలిసి గోదావరి జలాలను తరలించే విషయంపై అఖిలపక్షం నిర్వహించాకే సీఎం నిర్ణయం తీసుకోవాలన్నారు.
ఇక మోదీ స్కూటీ యోజన పథకం పేరుతో జరుగుతున్న ప్రచారంపైనా పురందేశ్వరి స్పందించారు. సోషల్‌ మీడియాలో టెన్త పాసైన విద్యార్థినిలకు స్కూటర్లు ఇస్తున్నారంటూ తప్పుడు ప్రచారం జరుగుతోందని.. దాన్ని ఎవరూ నమ్మొద్దన్నారు. ఒకవేళ అలాంటి పథకాలేవైనా అమలు చేయాలని కేంద్రం భావిస్తే.. ప్రధాని స్వయంగా ప్రకటిస్తారన్నారు.